VILLAS'MAZUNGUMZO YA MWISHO NI KUWA BALE HAUZWI"

Kocha wa Real Madrid Carlo Ancelotti hakutakiwa kuongelea usajili wa Bale hadharani, kocha wa Tottenham Hotspur Villas-Boas amesema jana Jumamosi.

 Ancelotti akizungumza kwenye mkutano wa waandishi wa habari jijini Los Angeles jumatano iliyopita alisema wapo kwenye mazungumzo na Spurs baada ya kuibuka kwa taarifa kwamba wanakaribia kuvunja rekodi ya usajili ili kumsajili winga huyo huyo wa Wales.

 Alipoulizwa kama anahisi Ancelotti hakuwa sahihi, Villas-Boas alisema: "Nadhani ndio, kwa maoni yangu. Carlo ni mtu ninayemkubali na kumheshimu sana, lakini hakuwa sahihi kulifanya lile suala la Bale kuwa hadharani. 

"Kuhusu hizi tetesi kwamba Bale anakaribia kujiunga na Madrid sio kweli kabisa. Kitu pekee ambacho tumewasiliana na Madrid ni kuwaeleza kwamba mchezaji wetu hauzwi."

Villas-Boas alikuwa akizungumza kwenye mkutano wa waandishi wa habari mara baada ya mchezo wa kirafiki kati ya Tottenham na Monaco ulioisha kwa Spurs kufungwa 5-2, mchezo ambao Bale hakucheza kutokana na kutokuwa fiti.

"Gareth ni mtu ambaye nampenda. Tunaongea na Madrid kwa sababu kuna heshima iliyojengeka baina ya vilabu hivi viwili kufuatiwa uhamisho wa Luka Modric," aliongeza Villas-Boas.

"Tunajenga timu nzuri kwa ajili ya msimu ujao. Tunajiandaa kwa Bale kuwa nasi. Lakini tunajua kwenye soka kila kitu kinawezekana," alisema.